ඔබත් මැද⁣ පෙරදිග රැකියාවට යාමට අදහස් කරන කාන්තාවක් ද?

ශ්‍රී ලංකාවේ කාන්තාවන් වැඩි දෙනෙකුගේ  අදහස මැද පෙරදිග ගොස් රන් කහවනු සොයාගෙන ඒමයි.ඇය විවාහක ලදක් නම් නිවසක් සාදා ගන්න, සැමියා සමඟ එක්වී ව්‍යාපාරයක් පටන් ගන්න ,දරුවන්ට හොඳ අධ්‍යාපනයක් ලබා දෙන්න යන දහසකුත් ප්‍රාර්ථනා පොදි බැඳගෙන මැදපෙරදිග යයි.අවිවාහක කාන්තාවක් නම් දෙමාපිය,සහෝදර -සහෝදරියන්ට උදව් උපකාර කිරීමට මෙන්ම තමන්ගේ විවාහයට දෑවැද්දක් සූදානම් කර ගැනීමේ අභිලාෂයෙන් මැදපෙරදිග රටක ගෘහ සේවිකාවක් ලෙස රැකියාවට යනු දැකිය හැකිය .

බොහෝ කාන්තාවන්  මැදපෙරදිග යන්නේ අරාබිකාරයන් ගේ වහල් මෙහෙවර කොට දහදුක් විඳ මිල මුදල් හරිහම්බ කරගෙන තමන්ගේ මව් රටට ආපසු සැපවත් ජීවිතයක් ගත කිරීමේ බලාපොරොත්තුවෙනි.නිදි ලොවේ දී දක්නා සුන්දර සිහින සැබෑ වන්නේ මැදපෙරදිග යාමෙන් බව වැඩි දෙනාගේ විශ්වාසයයි. මැදපෙරදිග දී අතුරු ආන්තරාවක් සිදු නොවුනි නම් සල්ලි මිටියක් ද රැගෙන ගුවනින් පියාසර කර  කිරිල්ලියක් සේ මැද පෙරදිග ගිය කාන්තාව සිය නිවස වෙත පිය නගනුයේ ඉදිරි අනාගත වැඩපිළිවෙල ද සැලසුම්කරගෙන යි.

මෙලෙස රැගෙන එන මිල මුදල්වලින් වලින් ප්‍රයෝජන ලබන කාන්තාවෝ සිටිති.එමෙන්ම පොදි බැඳගෙන ආ රුපියල් ලක්ෂ ගණන් මුදල් කෙටි කාලයකින් නැති නාස්තිකරගත් වනිතාවෝ ද සිටිති.ඔවුන්ට අවසානයේ ඉතිරි වනුයේ අරාබිකාරයකු විසින් දෙනු ලැබූ වැරහැලි ඇඳුමක් පමණි.

මෙබඳු ළඳුන් පවසනුයේ" ලක්ෂ ගණන් මුදල් ගෙනාවත් ඒවා කපුරු මෙන් දියවී ගිය බවයි".

ඉසුරු සොයා මැදපෙරදිග ගිය කාන්තාව විශාල මුදලක් රැගෙන සිය රටට පැමිණයද ටික දිනකින් තමා දුටු සිහිනය බොඳ වී යනු ඇත.ඇගේ  අදහස්, අපේක්ෂාවන් කිසිමදාක ඉෂ්ඨ නොවෙයි. මැදපෙරදිග ගිය ගමන නිෂ්ඵලයි.

නමුත් තවත් කාන්තාවන් පිරිසක් එසේ නොවෙයි.ඔවුන් මැදපෙරදිග ගොස් සතුටින් සේවය කොට තම මවිබිම⁣ට පැමිණ යහතින් කල් ගෙවීමට ලැබෙනු ඇත.ඇය මැද පෙරදිග  හාම්පුතුන්ගේ ප්‍රශංසා ලබා වැටුප් සමඟ තෑගිබෝග ද ලබාගෙන පැමිණෙයි.රැකියාව සාර්ථක ලෙස ඉටුකරන ඔවුන් ගෙයක් දොරක් හදාගෙන ලස්සන විවාහ ජීවිතයක් ගත කිරීමට ද වරම් ලබා ගනු ඇත.මැද පෙරදිග දී කාගේත් හොඳ හිත දිනා ගෙන සේවය කොට මව්බිමට පැමිණෙන ඔවුන් යම් යම් අවස්ථාවලදී කරදර බාධක උපායශීලීව තම කතාවේ බලයෙන් මගහරවා ගැනීමට ශක්තිවන්තියන්  වූහ.  මව් රටට යහතින් පැමිණ ජීවත්වීමට තමන් උපයාගත් මුදල තව තවත් වැඩි දියුණු කරගත හැකි මාර්ගයක යෙදවීමට ඔවුන් පසුබට නොවූයේය.

නමුත් තවත් වනිතාවන් පිරිසක් මැද පෙරදිග රැකියාව කිරීමේදී අනේක දුක් කම්කටොලුවලට මුහුණ දෙයි .තමා සේවය කළ ස්ථානයේ ස්වාමියාගෙන් සහ ස්වාමිදුවගෙන් සැලකිලි ලබා ගැනීමට තරම් ඔවුන් වාසනාවන්ත නොවීය.අතවර බාධක රාශියකට මුහුණ පාමින් තම රටට පැමිණ අතේ තිබෙන සියලුම මුදල් නැති කරගෙන දුකින් ජීවත් වීමට සිදු වනු ඇත.ඔවුන් කරදර රාශියකට මුහුණ දී මව් රටට පැමිණ අතේ තිබෙන මුදල් ද අනුන් වෙනුවෙන් වියදම් කර දුක්බර දිවියකට පත් වනු ඇත.

 මැද පෙරදිග යන ලදුන් මුදල් ගැන සිතීමට පෙර දහසකුත් දේ සිතිය යුතු නොවේද ?????